لو نفسك تكمل تعليمك الجامعي برا مصر، وبتدور على بلد تعليمها جامد وشهادتها محترمة، فألمانيا هتكون واحدة من أفضل الاختيارات اللي قدامك. ليه؟ لأن ألمانيا دلوقتي بقت تالت أكتر دولة في العالم بيجيلها طلاب أجانب، وده لأن جامعاتها قوية، ومعترف بيها في كل حتة.
طيب تبدأ منين؟
١- حدد انت عايز تدرس إيه؟
ألمانيا فيها تخصصات كتير جدًا، من أول الطب والهندسة لحد الفنون والتصميم واللغات، وكمان الذكاء الاصطناعي والتكنولوجيا. اختار المجال اللي بتحبه، وابدأ تدور على جامعة مناسبة ليه.
٢- اختار الجامعة المناسبة ليك
فيه أكتر من 400 جامعة في ألمانيا، منهم جامعات حكومية وجامعات خاصة. الجامعات الحكومية أغلبها مش بتطلب رسوم دراسية، بس فيه مصاريف خدمات للفصل الدراسي بتتراوح من 150 لـ250 يورو. وانت بتختار الجامعة، فكر في:
قوة المجال اللي عايز تدرسه جوه الجامعة
شهرتها في الأبحاث
المدينة اللي فيها الجامعة
لو فيها فرص للمنح أو سكن طلابي
٣- اعرف شروط التقديم
كل جامعة ليها متطلباتها الخاصة، فانت محتاج تدخل على موقع الجامعة اللي اخترتها وتشوف هما عايزين إيه بالضبط من أوراق، درجات، لغة، إلخ. ولو الجامعة بتتعامل مع نظام اسمه Uni-assist، فده موقع بيساعدك تقدم على جامعات كتير في نفس الوقت. تدخل عليه، تعمل حساب، وترفع أوراقك.
قبل ما تسافر، السفارة هتطلب منك إثبات إن معاك مبلغ يغطي مصاريفك السنوية في ألمانيا (حوالي 11 ألف يورو في حساب بنكي مغلق). ده علشان مصاريف زي:
السكن
الأكل
التأمين الصحي
المواصلات والدراسة
٥- دور على سكن
السكن مش بيكون متوفر تلقائي من الجامعة، فانت محتاج تدور بدري وتقدم على مساكن الطلبة أو تسأل في مجموعات فيسبوك للطلاب المصريين في ألمانيا.
موقع الهيئة الألمانية للتبادل الأكاديمي (DAAD) ممكن يساعدك في البحث عن سكن: اضغط هنا
٦- محتاج تدرس كورس تمهيدي؟ (Studienkolleg) لو انت خريج ثانوية عامة من مصر، أغلب الظن هتحتاج تدرس سنة تمهيدية في ألمانيا اسمها “شتودين كوليج” قبل ما تدخل الجامعة. ودي بتأهلك تدخل الجامعة في المجال اللي انت اخترته. بعد السنة دي، بتقدم تاني على الجامعة بناءً على درجاتك.
فيه جامعات ممكن تعفيك منها لو معاك SAT أو IGCSE بشروط معينة، فاسأل الجامعة مباشرة.
٧- فيه منح دراسية؟ أكيد! فيه منح من الحكومة الألمانية (زي DAAD) وكمان منظمات خاصة، بتقدم دعم مادي للطلاب الدوليين. بس المنح دي بتكون منافسة، وعايزة استعداد كويس من بدري. ممكن تلاقي المنح المناسبة ليك من خلال قاعدة بيانات المنح على موقع الهيئة الألمانية للتبادل الأكاديمي (DAAD):
كمان فيه جامعات بتقدم منح زي جامعة كونستركتور، ودي جامعة خاصة معترف بيها من الحكومة الألمانية، موجودة في مدينة بريمن، وبيدرس فيها طلاب من أكتر من 120 دولة. الدراسة كلها بالإنجليزي، وبرامج البكالوريوس عندهم بتغطي مجالات زي: الكيمياء، البيولوجيا، الفيزياء، علوم البيئة، علوم البيانات، إدارة الأعمال، والهندسة. الميزة إنك من أول سنة بتشارك في أبحاث، وبتتعلم على إيد أساتذة بيركزوا معاك بشكل فردي.
كمان الجامعة عندها نظام سكن مميز، بتقعد فيه مع زملاء من جنسيات مختلفة، وبيوفروا لك الأكل والسكن طول السنة بـ8000 يورو (مدعومة). التقديم سهل ومجاني، وبيكون عن طريق بوابة إلكترونية خاصة بيهم. ولو قدمت بدري (قبل أول فبراير)، فرصتك في القبول والمنح بتكون أعلى. تقدر تقدم حتى لو لسه مخلصتش ثانوي، هيقبلوك مبدئيًا لحد ما تطلع النتيجة. كمان لو كنت درست بالإنجليزي أو معاك درجات كويسة في SAT أو ACT، ممكن تتعفى من اختبار اللغة.
طب هل طلاب الثانوية من مصر ينفع يقدموا؟ أيوه، ينفع. بس لازم تبقى مخلص الثانوية العامة بمجموع كويس، وتجهز نفسك إما لدراسة سنة تمهيدية في ألمانيا، أو يكون معاك مؤهلات تعفيك منها زي SAT أو شهادة IGCSE. والأهم إنك تبدأ بدري، تجمع المعلومات، وتبعت للجامعات، وتحضر للغة الألمانية أو الإنجليزية حسب التخصص.
أخيرا دي مواقع رسمية للبحث عن منح بكالوريوس في ألمانيا:
