لو نفسك تكمل دراستك الجامعية في واحدة من أقوى جامعات العالم، منحة جامعة بكين ممكن تكون فرصتك!
منحة جامعة بكين للطلاب الأجانب بدأت سنة 2012، وهدفها دعم الطلاب المتفوقين من مختلف دول العالم، ومن ضمنهم طلاب مصر، علشان يدرسوا البكالوريوس أو الدراسات العليا (ماجستير ودكتوراه) في جامعة بكين، اللي تعتبر من أعرق وأقوى الجامعات في الصين وآسيا.
بالنسبة للراتب الشهري، بيختلف حسب المرحلة الدراسية:
البكالوريوس: 2000 يوان صيني في الشهر
الماجستير: 2500 يوان صيني
الدكتوراه: 3000 يوان صيني
طب مدة المنحة قد إيه؟
البكالوريوس: سنة واحدة في البداية
الماجستير: من سنتين لـ 3 سنوات
الدكتوراه: 4 سنوات
الدكتوراه المباشرة (من غير ماجستير): 5 سنوات
طب يعني البكالوريوس سنة واحدة؟ لأ طبعًا
مدة الدراسة الفعلية في جامعة بكين للبكالوريوس هي 4 سنين، لكن المنحة بتبدأ بسنة واحدة، وبعد كده لو الطالب محافظ على مستواه الدراسي، بيتم تجديدها سنة بسنة لحد ما يكمّل.
طب إيه التخصصات المتاحة للبكالوريوس؟
المنحة بتفتح لك الباب قدام عدد كبير من التخصصات في جامعة بكين، زي:
الطب
الهندسة
الاقتصاد والعلوم السياسية
الإعلام
اللغات
العلوم الطبيعية
تكنولوجيا المعلومات
الفنون والآداب
القانون
وغيرها كتير من التخصصات الأكاديمية القوية، بس مهم تتأكد من البرامج المتاحة سنويًا من خلال موقع الجامعة الرسمي، لأن مش كل البرامج متاحة دايمًا للطلاب الأجانب.
شروط التقديم:
علشان تقدر تقدّم على منحة جامعة بكين، لازم:
تكون حاصل على عرض قبول جامعي من جامعة بكين كطالب أجنبي جديد.
ما تكونش حصلت على منحة تانية في نفس الوقت.
ما تكونش مسجل في برامج خاصة زي: الشهادة المهنية، البرامج المشتركة، أو البرامج اللي تدرس بالكامل باللغة الإنجليزية.
طب وده معناه إنّي كطالب ثانوي في مصر أقدر أقدّم؟
أيوه، أي خريج ثانوية عامة في مصر يقدر يقدّم على منحة جامعة بكين، بس الموضوع ليه خطوات لازم تمشي فيها واحدة واحدة. أول حاجة لازم تعملها إنك تقدّم على جامعة بكين نفسها وتستنى لحد ما يجيلك “عرض قبول رسمي” كطالب أجنبي جديد.
بعد كده، تبدأ مرحلة التقديم على المنحة، وده بيكون في مارس أو أبريل من كل سنة.
يعني ببساطة، انت بتقدّم الأول على الجامعة، ولما يتقبل ملفك، بتقدّم بعدها على المنحة، مش الاتنين مع بعض في نفس الوقت. علشان كده مهم تبدأ بدري وتجهز أوراقك من بدري كمان.
خطوات التقديم:
ادخل على موقع التقديم الخاص بجامعة بكين:
www.studyatpku.com
اختر “طلب المنحة الدراسية” – “طالب جديد”، واملأ البيانات المطلوبة.
بعد ما تخلص، ابعت خطاب التقديم للمنحة بنفسك أو بالبريد لقسم الطلاب الدوليين في الجامعة.
اللجنة بتراجع الطلبات وتختار أفضل المتقدمين.
لو تم اختيارك، هيتم الإعلان عن اسمك ضمن المقبولين.
الطلبة المقبولين لازم يعملوا تقييم سنوي كل أبريل علشان يقدروا يكملوا الاستفادة من المنحة.
أخيرا.. لو أنت جاد ومهتم فعلاً، ابتدي من دلوقتي حضر أوراقك وخطط كويس، لأن جامعة بكين مش بس جامعة، دي بوابة لمستقبل مختلف تمامًا… وخليك فاكر بكالوريا معاك من الثانوية لحد الجامعة.
