لو نفسك تكمل تعليمك الجامعي برا مصر، وبتدور على بلد تعليمها كويس وتكاليفه مش غالية، فروسيا ممكن تكون من أفضل الاختيارات اللي قدامك.
ليه تختار روسيا؟
لأن روسيا واحدة من الدول اللي بتستقبل آلاف الطلاب الأجانب كل سنة، خاصة من العالم العربي وأفريقيا. التعليم هناك معترف بيه في جامعات كتير حول العالم، وفي تخصصات مطلوبة زي الطب والهندسة والطيران والعلوم.
طيب تبدأ منين؟
١- حدد إنت عايز تدرس إيه؟
روسيا فيها جامعات كتير بتقدم برامج للبكالوريوس في مجالات متنوعة، من أول الطب وطب الأسنان، لحد الهندسة، الصيدلة، تكنولوجيا المعلومات، والاقتصاد. البرامج دي بتتدرس بالروسي أو الإنجليزي على حسب الجامعة والتخصص، فاختار اللي يناسبك.
٢- إيه الجامعات المشهورة هناك؟
فيه جامعات روسية معروفة ومرموقة زي:
جامعة لومونوسوف – موسكو
جامعة سانت بطرسبرغ
جامعة الطب الأول في موسكو (Sechenov)
جامعة بومان للهندسة
جامعة رودن (جامعة الصداقة بين الشعوب – ودي عليها إقبال من العرب جدًا)
٣- طيب الدراسة هناك غالية؟
الرسوم الدراسية في روسيا تعتبر منخفضة مقارنة بدول أوروبا الغربية. بتتراوح غالبًا بين:
1500 لـ 5000 دولار في السنة لتخصصات زي الاقتصاد والهندسة
4000 لـ 7000 دولار في السنة للطب وطب الأسنان
ولو بتفكر تدرس طب أو هندسة في روسيا، فمهم تعرف إن تكلفة الدراسة هناك بتبدأ من حوالي 3400 لـ4000 دولار في السنة، وده رقم يعتبر قليل جدًا مقارنة بمصاريف الجامعات الخاصة في مصر أو بره.
لكن لازم تاخد بالك إن خريج الطب من روسيا لازم يعادل شهادته لو ناوي يشتغل في مصر بعد التخرج. المنح الروسية كمان مش بس بتغطي المصاريف الدراسية، لكن بتدي للطالب سكن جامعي ومصروف شهري بسيط حوالي 22 دولار، وده بيخليها فرصة ممتازة للطلاب من مصر والعالم العربي.
٤- فيه منح دراسية؟ أيوه.. ومن الحكومة الروسية كمان!
فيه منحة مشهورة جدًا اسمها منحة الحكومة الروسية (Russian Government Scholarship).
المنحة دي بتتفتح كل سنة وبتغطي:
المصاريف الدراسية بالكامل
سنة تحضيرية مجانية لدراسة اللغة الروسية لو هتدرس بالروسي
سكن جامعي بسعر رمزي
تأمين صحي
لكن مش بتغطي تذاكر الطيران أو مصاريفك الشخصية.
٥- التقديم للمنحة دي إزاي؟
التقديم بيتم أونلاين على الموقع الرسمي للمنحة الروسية:
وخد بالك المنحة دي بتفتح باب التقديم عادة في نوفمبر أو ديسمبر وبتقفل في فبراير أو مارس. أنت بتختار تخصص و6 جامعات تفضل تدرس فيهم، ولو اتقبلت، بيجيلك ترشيح للجامعة.
٦- طيب إيه شروط المنحة دي؟
تكون خلصت الثانوية العامة (أو في آخر سنة)
درجات كويسة خصوصًا في المواد الأساسية
جواز سفر ساري
تملا أبلكيشن المنحة طبعا
استعداد تتعلم روسي (لو مش هتدرس بالإنجليزي)
٧- وهل فيه دراسة بالإنجليزي في روسيا؟
أيوه، فيه جامعات كتير بتقدم برامج إنجليزي خصوصًا في الطب، الصيدلة، الهندسة، وإدارة الأعمال. بس عدد الأماكن محدود، وساعات بيكون الرسوم أغلى شوية من البرامج الروسية.
٨- طيب لو ماخدتش منحة، ينفع أقدم عادي؟
أيوه، تقدر تقدم على نفقتك الشخصية عن طريق التواصل المباشر مع الجامعات، أو من خلال الوكلاء المعتمدين، أو حتى تسافر وتحول منحة بعد كده.
٩- هل فيه سكن جامعي؟
أيوه، معظم الجامعات الروسية بتوفر سكن طلابي رخيص، ما بين 20 لـ50 دولار في الشهر. السكن غالبًا مش فاخر بس مقبول وآمن، وبتتعرف فيه على طلاب من دول تانية.
١٠- وأخيرا.. هل روسيا بلد كويسة للطلاب؟
روسيا بلد كبيرة وفيها مدن جميلة زي موسكو وسانت بطرسبرغ، وفيها جالية عربية كبيرة، وفيه أمان وخدمات كويسة للطلاب. لكن لازم تكون مستعد تتأقلم على الثقافة واللغة.
يعني من الآخر لو معاك مجموع كويس في الثانوية، وبتفكر تدرس طب أو هندسة أو أي تخصص تاني، روسيا خيار يستحق التفكير. المنح متاحة، والتكاليف مش عالية، والجامعات معترف بيها في أغلب دول العالم.
